ضروري جدا تقرأ لا بغيتي تعلم لانغلي ضغيا
كيفاش_تعلمت_الإنجليزية
ندخلو لبيت القصيد... إسم هاد البروﯕرام (يعني الإنجليزية بدون مجهود) على الأقل غادي يكونو واحد أو جوج د الناس سمعو بيه، مولاها واحد الساط ميريكاني سميتو هاد الكور بلفلوس تيدير 99$ (ولكن معنا فابور ) لي باز ديال هاد الميطود هما #السمع أولا كجزئ أساسي وكبير جداً، #الإجابة على الأسئلة ثانيا، ثم#الحركة .
طريقة ديال تعلم ديال هاد الساط خطيييرة خليني من حفظ كرد كرد وقيد كلا كلمة والمعنى ديالها، ولى كتب القواعد وحفظهم و ملي تبغي تدوي تبقى تفكر فكيفاش تصرف الفعل واش فالباست ولا الفيوتر لا نسى داكشي، هاد البروﯕرام اتحتاج فيه ليزيات، بيسي/طابليت/سمارتفون وتريح وتبقا تسمع سالينا.
يقدر تجيك غريبة تتعلم غير بالسمع حيت بدون شك جربتي تسمع فالمزيكا بالكلمات وتتفرج فالأفلام بالترجمة ولكن ماقشرتي تا لعبة (واخا المزيكا والأفلام، ضروريين ملي تبدا تفهم شويا)
الساط كيدير واحد العيبة كيسميها ميني سطوري (قصة قصيرة) على شكل PDF ومعاها 3 ديال الفيشيات MP3 الأول سميتو #الأوديو_أرتيكل غير تيقرى فيه بشويا قرائة عادية، #الميني_سطوري هادا هو الجخ، النـﯖـعة، المومّو ديال هاد البروﯖرام كيبدا يقرا جملة بجملة وكيسول سؤال بسييط نتا كاتجاوب بصوت مرتفع فالأول غير بـ ياس أور نو ولا آآآآه ولا تيقوليك خمم شي جواب المهم تفاعل معاه وتجاوب فأسرع وقت ممكن ديرها بحال لعبة، ولا حتاجيتي دير بوز وعاد كمل، #الفوكابيلير (VOCABULARY) فاش كاتكون كاتسنط خاص الـPDF يكون مفتوح قدامك غادي تلاحظ أنه شي كلمات تكتبو بالـﯖـغا فهاد الفيشي MP3 تيبدا يشرحهوم ليك بطريقة ضريفة وبسيطة، #البوينت_أوﭪ_ﭬـيو_ميني_سطوري ضوصي بوحدو فيه تقريبا نفس القصص القصيرة بالـPDF ديالها والـMP3 تيعاود ليك القصة فالبريزنت وهي نيت فالباست ويعاودها ليك فالفيوتر بهاد الطريقة كاتعلم والـﯖرامر بلا دوك القواعد المملة واللي كادوووخ ... شوف(ي) هاد الفيديو ديال 3 دقائق (https://youtu.be/v2mHKVQdLDw) كيتكلم فيه #Aj_Hoge عاد أجي كمّل القراية عفاك (خدم السوتيتغ إلى مفهمتيهش مزيان أش كيقول).
من بعد ما تفرجتي غادي تكون بدات كاتوضاح ليك الجوهر ديال هاد الطريقة اللي هو السمع هانتا كيما قال هو بحال شي دري صغير ميريكاني فاش كيبدا يتعلم ينطق أول مرة كيبدا غير يسمع يسمع يسمع يسمع يسمع يسمع يسمع يسمع يسمع يسمع يسمع يسمع يسمع يسمع يسمع يسمع يسمع يسمع يسمع يسمع(كثرت عليك أبخي نقولك علاش) عاد كيبدا ينطق ويسّول...
هاد البروﯕرام هو دو طابع عميييييق فالتعلم يعني إيلا كنتي كاتفكر فأنك غاتصنت لجميع الدروس من بعد غاتولي طيارة راك غالط، إوا أجي دابا نقوليك علاش كتبت "يسمع" لفوق بزاف ديال المرات حيت خاصك تبقى تصنت لـقصة وحدة بزاف دالمرات يقدر 3 أيام يقدر سيمانة يقدر 15 يوم ويقدر شهر كامل ﯖـاع آآآآيييه، وهاديك التكرار يفيد الحمار والله تا بصح #Aj_Hoge تيقوليك خصك تنسى الوقت ولكن مادوز للنيفو التالي حتى تولي ميتريزي ديك القصة مزيال بالفيشيات ديالها تولي حافضها يمكن تبقى غادي فالطريق ونتا كاتعاود ديك القصة بشكل تلقائي بلاما تخمم هنا كاتكون ستافدتي مزيـــــان كاتعرف راسك قادر دوز لنيفو التالي المهم قرا(ي) هاد الفيشي PDF عافاك، هو الدليل ديال الإستعمال كاتبو مول الشي كاين فالكور بالإنجليزية درت مجهود وطرجمتو للفرنسية باش تفهمو، فيه أحسن إستعمال للزمن اللي تقدرو تقراو فيه والترتيب ديال لي فيشي اللي غادي تسمعو، وفيه أحسن طريقة تناسبك باش تقرى ونتا مرتاح (مثلا واش 2 سوايع فالنهار واش غير ساعة ؟ تفرقها على 30 دقيقات...) الرابط ديال الدليل:https://goo.gl/4P2ePh
كاينة سلسلة ديال الفيديوات دارها هاد الساط #Aj_Hoge كيشرح فيها القواعد ديال التعلم الساهل وبلا تمـارة وكيفاش ماتبقاش تقليدي فتعلم اللغة.
1• تعلم بالجُمل معمرك تتعلم بكلمة وحدة، الكلمة ديرها فجملة وعقل عليها
2• ماتقراش قواعد النحو والـﯖرامر، حرق الكتوبة ديال القواعد من اليوم معمرك غاتحتاجهم،
3• تعلم بودنيك ماشي بعينيك، سمع سمع سمع (غير 3 باركة هاد المرة هههه) باش تتعلم أكثر ما يمكن من الفوكابيلير
4• تعلم بعوووومق (العووومق العوومق هههه) يعني التكرار تصنت كل نهار ونتا غادي للمدرسة أو راجع غادي للخدمة فالطواليط قبل لا تنعس... المهم دو إيت أﯖين أند أﯖين أند أﯖين
5• البوينت أوﭪ ﭬـيو ميني سطوري (نفس القصة معاودة فبزاف ديال الأزمنة) هي باش تاتعلم الـﯖرامر بلاما تحس
6• لوح داك الزمر كامل ديال تعلم في 7 أيام وماجاورهم، تعلم الأوريجينال، قرا الكتب، سمع لنايتيف سبيكر (الناس اللي مالين اللغة النـﯖالزة والمراكنة)
7• القاعدة الأخيرة غادي تعلمك كيفاش تهضر بزربة والهضرة تخرج ليك بلاما تفكر بحال شي نايتيف سبيكر باش هادشي؟ بسؤال/جواب على الميني سطوري اللي مذكورة الفوق.
عافاك شوف هاد الفيديوات بالترتيب هاك الرابط: http://goo.gl/QrYaxt كانة الكتابة تحت كل فيديو سمع وقرا باش تفهم عافاك.
هذا رابط ديال تحميل هاد الدرس اللي كيدير 99 دولار هاك هاهو فابور فيه 7 جيـﯖا مقسمة لعدة أجزاء : 1-https://1fichier.com/?pzku9t58vv
هاد البروكرام خاصو على الأقل 3 أشهر ديال المعقووول ودير راسك فيه ملي غاتوضاح ليك الأمور ندوزو دابا للجزء ديال الفينيسيووو من بعد ما بنينا.
هاااام جدا ; ضروري تحترم الترتيب ديال الدرس و الا راك مغتفهم والو وغادي يطلع لك الدم و تستسلم
هاد جوج ساطات اللي غانعطيكم دابا كيعلموك كيفاش كيدوي النيتيف سبيكر وكيشرحو ليك مخارج الحروف وكيفاش تولي الهضرة ديالك مسترسلة بحال شي ﯖـاوري.
• الساطة الأولى سميتها ريتشل ميريكانية وهادي البلوﯖ ديالها فيه لي فيديو ديالها تبعها فالفيسبوك عندها بزاف ديال البشار كيتعلم كيفاش ينطق مهم فلي البلوﯖ ديالها الرابط: http://goo.gl/KP2tNx
• الساطة الثانية نـﯖليزية سميتها مينوو تاهية كاتعلمك كيفاش تنطق بحال شي نـﯖليزي https://goo.gl/fqK69v
أسيدي معندي مايتسالك تبعتي الكوور وليتي كاتفهم وليتي كاتعرف دوي، وليتي تقدر تفهم الأستاذ، دابا قررتي باش تدخل لافاك (دير باك ليبر ودخل وخا تكون عندك 50 عام وخا تكون خدام) ولا توجد شي شهادة ديال TOFEL ولا IETSL أحسن موقع فين تتعلم القواعد والمطيريال باش تبدا تقرى هو موقع :www.engvid.com موقع خطييير جداً والأساتذة فيه طخي سييمبا دخل كتاشفو راسك.
راه والله لا تعلمتي دوي مقاد إيلا ماغلطتيش حيد الخوف من الغلط من القاموس ديالك عارف الدعوة مقودة مع المغاربة حيت حنى حـﯖارة ولا كان المغريبي عندووو معا الإنجليزية وغلطتي قدامو غايبدا يصحح ليك ويعيق عليك وهادشي عشتو معا صحابي بعد المرات كيغلطوني بلعاني باش يطنزوو، نصيحة بي كووول أند ريلاكس براتيكي فالسيتات ديال التعارف بحال شاطروليت (chatroulette.com)، دخل لـﯖروبات ديال الفيتناميين والماليزيين اللي كيتعلمو براتيكي معاهم والله تا خاوار دوك الناس، ومحدك كاتغلط وماكاتحسش بالقمعة قدام هاداك اللي كادوي معاه ونتا كاتعلم، أنا كنت كاندير واحد البلان فشكال بحكم كانستعمل التران الي كيجي من فاس كيكونو فيه الـﯖورّ بزاف كانضبر فشي مقصورة لا فيها شي كوبل ﯖـاوري راسو كيهضرو كانريح وكانبدا نسمع ملي كانفهم كانبدا نتبسم (ديك اللعبة راني كانفهم ههههه) صافي تاتجبد الكونفيرساسيون تاندخل نبدا نبراتيكي أقسم بالله إلا عمر شي ﯖاوري قاليا راك ماتاتهضرش مقاد واخا يالاه بادي ومزال كانكح مها السبيكين وخا هاكاك كيعطيوك الثقة فالنفس الكفـار بالله وهاكا شويا بشويا حتى لآخر مرة شديت ميمة ألمانية فمهرجان الصويرة تخايل بدينا كناقشو الأزمة السوية واللاجئين السوريين فألمانيا وا كانهضر وكانتجاوب أنا تصدمت فراسي اللي هادي 3 سنوات قبل كنت بغيت نقول Great (ﯖرييت) نطقتها Graat (ﯖـرَات) الدراري خراو عليا بالضحك، ملي قلت ليها راني تعلمت الإنجليزية غير فالأنترنت وحق الرب إيلا بقات حالا فمها
هاد النوطة ماقريتها فتا بلاصة كتاشفتها راسي ألا وهي بغيتي تعلم شي لغة بدا تخدم بيها كيفاش، مثلا بالنسبة للإنجليزية حاول دير تيليفون بالإنجليزية البيسي الفيسبوك اليوتيوب (منصحكش بالنسبة للكونط بونكير هههه) دور راسك بالإنجليزية بقا تشوفها غير هيا هاكا غاتلقى شي كلمات عرفتي المعنى ديالهم وبديتي تستخدمهم بلاما تشعر...
الـﭬلوﯖ هو داك الستيل ديال شي واحد كيعاود شي حاجة وكيصورها فيديو يقدر رحلة يقدر زواج يقدر أي بلان كانين مراكنة فاليوتيوب كيديرو هاد البلان يقدر تعيش فميريكان (كيما داير أنا 
) من اليوتيوب مثلا بنادم غادي المارشي كيديك معاه ويبدا وريك أش تقدى، ولا ليوما غادي وجد كادو لصاحبتو كيصور ليك (تفرج تا لا مافهمتيش تعرف غير شنو تجيب لساطة هههه) هاد الفيديوات كيعاونوووك بزااف باش تولي تفهم الإنجليزية الأصلية كيما تيهضرو بيها وتحسن من مهارات السمع ديالك.
) من اليوتيوب مثلا بنادم غادي المارشي كيديك معاه ويبدا وريك أش تقدى، ولا ليوما غادي وجد كادو لصاحبتو كيصور ليك (تفرج تا لا مافهمتيش تعرف غير شنو تجيب لساطة هههه) هاد الفيديوات كيعاونوووك بزااف باش تولي تفهم الإنجليزية الأصلية كيما تيهضرو بيها وتحسن من مهارات السمع ديالك.
ملي وصلتي حتا لهنا فالقراية نتا راك واعر ومهتم وباغي تعلم، لذلك بغيت نقول ليك شفتي بلا واحد الحاجة ألا وهي #العزيمة و #الحلم راه قبل من هاد الوصفة السحرية إيلا ماعندكش هادو غير نسا شحــال ديال ناس خسرو زبابل ديال الفلوس فليكور والو ماتعلمو تاحاجة... العزيمة والإصرار هوما المحرك ديالك (شوف راسك من هنا 5 سنين شاد(ة) بزاف ديال التيتيز ميريكاني مدورهم بيك وكاتشرح ليهم على قصة نجاحك وهوما كيتصنتو بشغف) وهوما باش غادي تحارب أكبر مشكل غادي يواجهك فهاد الرحلة ألا وهو الملل، مليتي قلب بدل ساعة بخرى ولكن ارجع فأقرب وقت وكمل، والوقت غادي يدوووز بزربة وفالأول ماغاتفم والو وغادي تسنطح معا مها وتبقى بحال لهبيل طيح وتنووض نتا كيجيب ليك الله راك غير كاتخووور ولكن فاش كيدوووز الوقت عاد كاتحس بالفرق، وعنداك عنداك يحسابليك غايجي واحد النهار غادي تسمي راسك عندك مع الإنجليزية... تعلُّم الإنجليزية هو #رحلة معندهاش نهــاية ومانتا إلا رحّالة غادي هاز صاكك فكتافك وذاك الصاك ثقييييل ومسافر وكاتعلم كل نهار حاجة جديدة والبلاصة اللي بتي فيها اليوم غدا ماغاديش تلقاك كيفما نتى فالبلاصة الثانية اللي غاتبات فيها ونتا مسافر كل محطة كاتلقاك زدتي تعلمتي كيفاش مادخلش عليك شنيولة بالليل كيفاش ماطفاش ليك العافية كيفاش تصيد ما تاكل ونتا غادي وكاتعلم... شوفوها هاكا معندكش نقطة وصوول هاكا كيفاش تخيل راسك وفالأخير خليوني نختم بهاد جوج مقولات :
“The more you know the more you know you don't know, and the less you know the more you think you know.”
― Aristotle
“Anyone who stops learning is old, whether at twenty or eighty. Anyone who keeps learning stays young.”
― Henry Ford
منقوول للاستفادة فقط
0 التعليقات لموضوع "ضروري جدا تقرأ لا بغيتي تعلم لانغلي ضغيا"
الابتسامات الابتسامات